అప్పుడు కూడా నువ్వు ...!

 పాపాయి ఫోన్ చేసింది,లైబ్రరీ కి వెళుతున్నానని చెప్పింది."లైబ్రరీ కి వెళ్ళడానికి కూడా makeup వేసుకుంటున్నా అమ్మా! ఎందుకు చెప్పూ,మొన్న హాస్పిటల్ లో అడ్మిట్ అవటానికి వెళుతున్నప్పుడు కూడా రెడీ అయ్యి వెళ్ళా అమ్మా, నేను చచిపోయాక నా బిడ్డలకు చెబుతాను నాకు క్లాసిక్ మార్లిన్ మన్రో మేకప్ వేసి బరీ చేయమని "అన్నది."తల్లి సాలు బొల్లి పిల్ల కదా "తల్లి చేలో మేస్తుంటే దూడ మాత్రం గట్టున మేస్తుందా అని నిట్టూర్చి ,పనిలో పనిగా" ఒరేయ్ నేను చచిపోయాక నాకు క్లాసిక్ మేకప్ వేసి, ముత్యాలు,పచ్చలు ,కెంపులు వుండే నగలు పెట్టి నన్ను వారణాశిలో గంగ ఒడ్డున దహనం చెయ్యాలి"అని నా కోరిక కూడా చెప్పేశా .వెంటనే పాపాయి " అమ్మ ,అమ్మ వద్దమ్మ,నిన్ను పూడ్చి పెడితే అప్పుడప్పుడూ నీ దగ్గరికి వచ్చి ఇట్లాగే నీ తల తినొచ్చు కదమ్మా,కాల్చడం వద్దమ్మా " అన్నది.నేను తల్లి ప్రేమతో వెంటనే నా కాశీ కోరికను గంగలో కలిపేసి "సరేలేవే! కానీ నన్ను పూడ్చిన చోట నా పైన ధాన్యం పండించి ఆ ధాన్యాన్ని దానం ఇవ్వు "అన్నాను. దానికి కూడా"అమ్మ అట్లాగ కూడా వద్దమ్మ "అన్నది.అంటే నన్ను ఏం చేయాలో ఇదమిద్దంగా ఆలోచించలేదనమాట, మొత్తానికైతే,తను ఎక్కడుంటే అక్కడ దగ్గరగా పెట్టేసుకోవాలని ఆలోచన ఒకటి మనసులో ఉన్నట్టుంది.మళ్లీ ఒక నిమిషానికి కాస్త ఆలోచించి ,"ఏమో అమ్మా,ఏదయినా నచ్చకపోతే అప్పుడు కూడా వచ్చి బెదిరించేస్తావ్ నన్ను" అన్నది.నాకు నవ్వొచ్చింది"ఫరవాలేదు లేవే పాపాయి! ఆ మాత్రం అమ్మంటే భయం వుంది,ఇంక నిశ్చింతగా చచిపోవచ్చు "అని చెప్పాను.

నిజాలిన్ గప్పా!

పాపాయి ఇప్పుడు ప్లస్2 చదువుతోంది. మానవీయ శాస్త్రాలు తన గ్రూప్.ఈ రోజు  నా తల దగ్గర కూర్చొని రేపటి పరీక్ష   కోసం పడీ పడీ చదువుతోంది. వద్దన్నా నా మనోప్రాణాలన్నీ దాని చుట్టే తిరుగుతూ వుంటాయి కదా  ,దాన్లో భాగంగా "నిజాలిన్ గప్పా" పేరు నా చెవిలో పడింది.ఇదేం పేరు అనుకుని సరేలే అని ఊరుకున్నాను. మళ్ళీ కాసేపటికి వల్లె వేయడం లో భాగంగా "నిజాలిన్ గప్పా"వచ్చాడు.ఈ సారి "నిజాలిన్ గప్పా ఫ్రమ్ మైసూర్" అని నా చెవిలో పడింది.ఈ సారి ఎవరబ్బా నాకు తెలీని ఈ మైసూర్ గప్పా అనుకుని పక్కనే పేపర్ చదువుకుంటున్న  పాపాయి వాళ్ళ నాన్నని కేకేశాను.నాన నేను "నిజాలిన్ గప్పా" ఎవరు అని అడగగానే పేపర్లో నుండి తలెత్తకుండా ,"నిజాలిన్ గప్పా"ని సింపుల్ గా నిజలింగప్ప ఎవరో చెప్ప సాగాడు.నాన్న ఎప్పుడయితే నిజలింగప్ప అన్నాడో మిగిలినది వినకుండా నాకు "నిజాలిన్ ...గప్పా"ఎవరో అర్తమయిపోయింది .నేను పాపాయి వైపు చూస్తూ వుంటే పాపాయి ,నేనేం చేసేది అమ్మా,  ఇంగ్లీష్ లో  అలా వుంది అని ఆంగ్ల భాష పైకి నేరం తోసేసి , అప్పటికీ  నీకు తెలియకుండా , వినిపించకుండా చదవాలనుకుని మరిచి పోయా అన్నది.

పగలు కురిసిన మేఘం

నా బుజ్జి బంగారు తల్లి , పొద్దున్నే ఫోన్ చేసింది " అమ్మ ..అమ్మా ! రాత్రంతా వానొచ్చిందమ్మా , మెరుపులొచ్చాయమ్మా  కానీ , పొద్దునయ్యేసరికి తగ్గిపోయిందమ్మా " అంది ఏడుపు గొంతు పెట్టేసుకుని ,బడికి పోవాలి కదా అనిచెప్పి . నేనన్నాను "అయ్యో .. ప్చ్ ! ఏం చేద్దాంరా , నేను గనుక మేఘాన్నయ్యుంటే పొద్దున్న నువ్ బడికెళ్లే సమయానికి కురిసేదాన్ని " అన్నాను . పాపాయి " అవునమ్మా ! ఈ మేఘం నీలాంటిది కాదమ్మా , బుద్ధిలేని మేఘం , చెత్త మేఘం " అని నిర్ధారించింది . 

'' చూసావామ్మా ! మమ్మీ ఎంత ముదురో '' !

పాపాయి తొమ్మిదో క్లాస్ చదువుతుంది కదా .. కానీనేమో దానిదింకా ముద్దుగారే అమాయకపు బుర్రే . ఏమైందీ ,ఆ మధ్యన ఫిబ్రవరి 14 వచ్చింది కదా ఆరోజుకి ముందురోజు మధ్యాన్నం నేను దానికి ఫోన్ చేసాను . మమ్మీ దానికి పక్కనే కూర్చుని బువ్వ తినిపిస్తూ వుంది . పాపాయి ఫోను అందుకోగానే ''అమ్మా ఈ రోజు మా స్కూల్ లో అన్ని క్లాసులకి కిటికీలు మూసేస్తున్నారమ్మా '' అన్నది . నేను ఆశ్చర్యపడి ''ఎందుకమ్మా ?''అని ప్రశ్న వేసాను . అది '' నీకు తెలీదా..  వాలంటైన్స్ డే రోజు అబ్బాయిలందరూ అమ్మాయిలకి ఏమయినా లెటర్లు ,గిఫ్టులు ఇస్తారని అట్లా చేస్తారు '' అన్నది . నేను '' మరీ చోద్యంరా ఇది కిటికీలు మూసెయ్యడం ఏంటీ చిత్రంగా '' అని దీర్ఘం తీసాను . పాపాయి ''నీకు తెలీదులేమ్మా ! మా స్కూల్ వాళ్ళు ఏది చేసినా అది మంచిదే '' అన్నది . నేనేమో తారీఖులు గుర్తులేని గృహ జీవితంలో వున్నా కదా అందుకని , ''యెప్పుడురా ఇంతకీ ప్రేమికుల రోజు ?'' అన్నాను . పాపాయి ఏమనుకుందీ  చాలా చాలా కాలం నుండి ఫిబ్రవరి పద్నాలుగో తేదీన ప్రపంచం ప్రేమికుల రోజు అని ఒకటి జరుపుకుంటుందనీ ,అది తనలాటి చిన్నపిల్లలకి కూడా తెలుసుననీ , అమ్మకి తెలియకపోవడమేమిటనీ చాలా ఆశ్చర్యపడి ''నీకసలు వాలంటైన్స్ డే ఎప్పుడో నిజంగా తెలీదామ్మా '' అన్నది బిగ్గరగా . నేను దాని ఆశ్చర్యానికి ముచ్చటపడి ,దాన్నలాగే కొనసాగిద్దామనుకుని ''తెలీదురా '' అన్నాను . పాపాయి ఆశ్చర్యంతోనే అన్నం తినిపిస్తున్న అమ్మమ్మ ని '' నువ్వు చెప్పుమా వాలంటైన్స్ డే ఎప్పుడో '' అన్నది . మా అమ్మ చాలా గర్వంగా ,తనకున్న అపారమైన పత్రికా జ్ఞానాన్ని ప్రదర్శిస్తూ '' ఫిబ్రవరి 14 రా  ''అన్నది . మా అమ్మాయి వెంటనే '' చూసావామ్మా ! మమ్మీ ఎంత ముదురో '' అన్నది

.హమ్మయ్య ! ఎలాగయితేనేం ,ఇవాళ నేను ముదురు కాకుండా తప్పించేసుకున్నాను ! 

ఒక్క నిముషం కళ్ళు మూసుకుంటే పోలా !

ఈ మధ్య కొత్తగా పాపాయి వాళ్ల  తాత ,మమ్మీ అందరూ కలిసి నెట్ ఫ్లిక్స్ లో అవీ ఇవీ చూట్టం మొదలు పెట్టారు . పాపాయి కి అత్యంత ఫేవరేట్ ''వాంపైర్ డయరీస్ '' దుర్గాపూర్ లో మా ఇంటి ఎదురుగా కాపురముండే  వీధి కుక్కకి కూడా ''ఎలెనా గిల్బర్ట్ '' అని అందులోని హీరోయిన్ పేరు పెట్టింది . సరే అట్లా తాత ,మనవరాలు ,మమ్మీ అని పిలువబడే అమ్మమ్మ అందరూ ఇవి చూస్తూండగా ,ముద్దులు గట్రా వస్తే తాత '' చిట్టీ ! తీసేయ్ తీసేయ్ '' అంటాట్ట . ఆ విషయాన్ని నాకు కంప్లైంట్ చేస్తూ పాపాయి ''ఒక్క నిముషం వాళ్లిద్దరూ కళ్ళు మూసుకుంటే  పోలా అమ్మా  ! దానికి మార్చడం ఎందుకు చెప్పూ !'' అన్నది . నేను చాలా ముచ్చట పడి  , '' కళ్ళు మూసుకోవాల్సింది నువ్వు కదరా పాపాయీ  ''! అన్నాను .